回首頁
回首頁
 


台灣史詩 (1)

-台語朗誦-   (漢字版)

◎周明峰

當埃及法老王起金字塔
中國黃帝在黃河做土霸
太平洋中一個寶島仙山
原住民及鹿仔做夥生活
十一種族屬Polynesia
古早就獨立自由有文化

幾若千年中國攏呣知
東旁海外美麗的所在
宋朝不時人禍兼天災
百姓散赤夭餓可憐代
逃生去南洋海角天涯
外邦討食啥人會理解?
呂宋華僑兩萬人受殺
祖國講無死的上嘉哉
離開大中國欲哪會使?
互人蹧蹋殺死是應該!
澎湖的移民對福建泉州來
元朝設官府是歷史頭一擺
四百年後才有仙島的記載
漁民農夫海賊代先來看覓
呣知琉球大灣抑是灣台?
稱做台員是明朝的時代
官廳規定寸板不准落海!
先民冒險渡台悲慘無奈

西洋人的腳踏
上早是葡萄牙
Ilha Formosa!
台灣美麗島啊!
荷蘭隨在後壁
將澎湖提去食
明朝顧澎湖派兵來拍
台灣放互荷蘭人去掠
漢人代先移民來遮
顛倒荷蘭在做王爺
起造赤崁樓紅毛城
統治了三十八年半
北部互西班牙
侵佔十五年外

荷蘭人一手舉槍
另外一手提聖經
帶來西洋的宗教及文明
迫台民做奴隸互伊差用
鹿皮硫黃米糖等等
搶劫資源掃甲清清
郭懷一招呼兩萬人起來革命
殺輸荷蘭及原住民聯軍三千
一萬外台灣人就按呢來犧牲
台灣人勇敢抗爭第一批精英
台灣及中國無仝情形
對旦歷史另外行一旁


作者周明峰為復健專科醫師 (Emerson M. F. Jou, M.D., M.P.H.)

周明峰文集

台灣e新聞