美國二粒原子彈(tôaⁿ)
日本舉手喝呣敢
八月十五來投降
台灣自治做主人!
地位歸屬猶未定
怎樣中國來統領?
十月二五閣淪陷
陳儀帶兵來侵佔
祖國軍隊退褪赤腳
手mo̍͘h面桶腰揹鼎
香蕉bē曉擘皮食
腳踏車哪扛teh行
提水道頭來釘壁
白tòa白食閣beh掠
外省人接收掌管
仝頭路待遇卡高
做肝做kiān激大辦
心內欲哪有台灣?
搶劫米糖及黃金
煙酒生理逐項禁
貪污詐欺犯罪深
政府目睭呣thì kim
台灣「光復」真食虧
餓死同胞一大堆
物價一日一日貴
阿山一日一日肥
二月二七圓環邊
拍死百姓無代誌
台灣人命無值錢
受thâi受掠革命起
全民khiâ出來抗議
紳士開會來處理
要求民主及公義
換來大刀及槍子
踳踏二萬好「番薯」
殺人兇手攏是「豬」!
關監槍殺數十年
歷史悲劇底時止?
[註] 謝謝鄭良偉教授的台文指導!
周明峰
一九九二年二月一日 檀香山
|
